Bilbao Kirolak erakundeak, EHUrekin batera, Bilboko XII. Aste Olinpikoa antolatu du, eta azaroaren 22tik 26ra bitartean egingo da. Aurten, ekimena saskibaloiaren ingurukoa izango da, eta luxuzko gonbidatuak egongo dira: domina olinpikoa duen Juan Antonio Corbalán, selekzioan aritu den Marina Ferragut, Manuel Coloma hautatzaile ohia, Espainiako Saskibaloi Federazioko presidentea den José Luís Saez, eta NBAn espezializatutako Ramón Trecet kazetaria. Gainera, domina olinpikoa duen Juan Manuel López Iturriaga bilbotarrak inaugurazio-hitzaldia
emango du.
Bilboko Zazpi Kaleetan dagoen Bidebarrietako liburutegia aditu eta zaleen topagunea izango da, azaroaren 22tik (astelehena) 26ra (ostirala) bitartean. Iturriagak emango duen inaugurazio-hitzaldia astelehenean izango da, 20:00etan; aurretik, 18:30ean, Arriaga plazan, bandera olinpikoa jaso eta ereserki olinpikoa joko da. Ostegunean, azaroaren 25ean, Euskadiko saskibaloiari buruzko mahai-ingurua egingo da, Jagoba Tirado eta Ramón Trecet kazetariek moderatuta. Hauek izango dira mahaian: Txingudi Saskibaloi Elkarteko Nieves Alza, Lagun Aro Gipuzkoa Basket taldeko Miguel Santos, Caja Laboral Saski Baskonia taldeko Josean Kerejeta, eta Bizkaia Bilbao Basket taldeko Gorka Arrinda. Gainerako egunetako bakoitzean bina hitzaldi eskainiko dira, 19:00etan eta 20:00etan.

Programa

Iruzkinak itxita daude